ភ្នំពេញ៖ នាថ្ងៃពុធ ទី១២ ខែមិថុនា ឆ្នាំ២០២៤ ឯកឧត្តម អៀង វ៉េងស៊ុន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាស្តីពី ការពិភាក្សាប្រមូលធាតុចូលសម្រាប់ចងក្រងឯកសារក្រោមគម្រោងពង្រឹងសមត្ថភាពរដ្ឋបាលកំពង់ផែ ក្នុងព្រះរាជាណាចក្រកម្ពុជា ។

កម្មវិធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ លោកឧញ៉ា លោក លោកស្រី ជាថ្នាក់ដឹកនាំក្រសួង ស្ថាប័ន តំណាងស្ថានទូតជប៉ុនប្រចាំព្រះរាជាណាចក្រកម្ពុជា ទីភ្នាក់សហប្រតិបត្តិការ អន្តរជាតិជប៉ុន(JICA) មន្ទីរសាធាណការ និងដឹកជញ្ជូនខេត្ត​ ក្រុង អង្គភាពពាក់ព័ន្ធ និងវិស័យឯកជន មានចំនួនសរុប ប្រមាណជិត២០០នាក់។

សិក្ខាសាលានេះ ត្រូវបានរៀបចំឡើងក្រោមកិច្ចសហការរវាង ក្រសួងសាធារណការ និងដឹកជញ្ជូន និងទីភ្នាក់ងារប្រតិបត្តិការអន្តរជាតិជប៉ុន (JICA) ដោយមានការចូលរួមពីក្រុមហ៊ុនប្រឹក្សាយោបល់ជប៉ុន OCDI និង Oriental Consultant Global (OCG) ក្នុងគោលបំណងដើម្បីប្រមូលធាតុចូលសម្រាប់ចងក្រងជាឯកសារក្រោម “គម្រោងពង្រឹងសមត្ថភាពសម្រាប់ការគ្រប់គ្រងកំពង់ផែ” ជាផ្នែកមួយនៃគម្រោង “គោលការណ៍ណែនាំសម្រាប់ផែនការអភិវឌ្ឍន៍កំពង់ផែ” និង “ស្តង់ដារបច្ចេកទេសកំពង់ផែនៅកម្ពុជា”៕